Naija no get problem for goal
Ike Shorunmu wey b d Oga Kochi for d goalkipas for d supa eagus of Naija say wahala no dey atol for him department.
Na 3 goalkipas wey dey play dem futbal for Naija ligue na dem dey camp now for Abuja and dem b Chigozie Agbim, Daniel Akpeyi and Femi Thomas for wich all of dem go fight make Oga Keshi take dem go South Afrika for d AFcon.
E b like say na Vincent Enyeama and Austin Ejide wey b goalkipas for obodo oyinbo na dem go join d 17 playas wey dey play dem futbal for yurope, but Oga Keshi neva call d name.
Oga Shorunmu tok say make Naija no worri jaree as him promise say na by fom na hin dem go take select all d 3 goalkipas wey go travel go AFcon.
“Three of dem wey dey here dey try since we don open camp on Monday and I want make dem cari on as we no get any wahala for our goalkipas.
“D only wori wey dey ground na who to pick go AFcon but na all of dem dey fit to chalenge dem mates wey dey come from obodo oyinbo,” Shorunmu tok.
Shorunmu aded say na by merit na hin dem go take select playas wey go folow dem go d ogbonge AFcon kompetison for South Afrika.
“No bodi dey sure of shirt among all of dem weda u dey play for obodo oyinbo or Naija, na wetin dem sabi for camp na hin go tok for dem,”
Keshi and him koches go name d 17 playas wey dey play for obodo oyinbo bfor xmas as dos wey dey play for Naija go travel go Portugal for dem fina preps.
D supa eagus of Naija dey group C and dem go play Burkina faso, Zambia and Ethiopia.