Sneijder don join Galatasaray
by Andrew Randa 21 January 2013, 08:18
Holland midfielder Wesley Sneijder don waka join Turkey club
Galatasaray afta all the gbege wey hapin as per in kontrak for Inter
Milan, the playa bin tok for Sunday.
Sneijder confam the gist say in don gree with everi for the telephone
intaview wey in do with Galatasaray website ( www.galatasaray.org) and
in dey hope to play in fess match for thr derbi wey dem get with
Besiktas one week from today.
" E do craze oh! I go like the the way the stadium go dey with all the
fans dem, i no fit wait oh, me wan waka dere go tap ball" the 28 years
old player tok.
" I go try make Galatasaray fans dey veri proud and make dem jolly. I
wan see dem, holla, come chop knuckle so dat we go dey move
togeda."
Sneijder na one of the ogbonge playas for 2009-2010 seasin, and even
as e be say in form don drop small, the way in waka go Turkey go
surprise plenti pipu wey go feel say in for stay for Europe dem, big
big kontri
The korrect freekick specialist bin join Inter Milan for 2009 afta in
spend two seasin for Real Madrid, come hel Inter win one Serie A,
Champion Lig plus Italian Cup for in fess seasin for the club dat time
wey Jose Mourinho b dier coachi.
In also help Holland reach the World Cup final for 2010, dem even beat
Brazil for road to reach the final.
Sneijder don join oda playas wey don waka lif Italo Lig, playas like
Zlatan Ibrahimovic and Thiago Silva don step waka from Inter dem nebo
AC Milan and Ezequiel Lavezzi sef lif Napoli.
The Holland playa gbege wit Inter bin start for Decemba time wen the
klub bin ask m to extend in kontrak from 2015 make e reach 206 for the
same moni wey dem dey pay am, even world playa union FIFPro bin yab
the runs.
.Since dat time, Inter no kuku come dey pay am even as coachi Andrea
Stramaccioni dey claim say na becos of taktikal reasin.
Na onli three time Sneijder don play for Serie A dis seasin.
Galatasaray dey numba one for Turkey Supa Lig and dem go play Besiktas
for Jan 27. Sneijder tok say in go show for Instanbul come take
introduce reach suppotas for Monday. " I go readi for dat game," in
tok.
