Guardiola wan come Ingland
by Andrew Randa 16 January 2013, 14:39
Pep Guardiola don comot tok say in dey gbadu Ingiland football, and in
get ambishun to manage for Premeir Lig veri soon, the foma Barca
coachi wey pipu dey find anyhow yarn.
Guardiola wey b 41 years, cari break from football wahala make in rest
afta in bin lead Barca win 14 cup for four seasins wey in dey there,
plus the three straight La Lig wey in win, and dis month sef, the
ogbonge coachi don confam say in go start to dey coach from next
seasin wey dey come.
Media pipu don dey yarn tey tey dey link am with klubs wey dey
Ingiland, Chelsea, Manchesta United and Manchesta City dem, pus Bayern
wey dey Germany and Paris St Germain for France
" I dey always gbadu Ingiland football, i like as the area b, the fans
and supporters dem" Guardiola yarn from New York wey in dey stay wit
in family for message wey comot for Ingiland Football Association
website (www.thefa.com)
" Dat time wey i b playa, i bin dey drea to play for Ingiland, but e
no come happin, but i dey hope say veri soon for future, e go happin,
i fil say i get challenge make i b coachi abi na manaja for dat side,
me sef wan experience wetin dem dey experience for dat side" in
tok.
"Na unique tin make pesin play for dat Lig, me wan feel the
supporters, the environment, media dem and the style wey the players
dey display, infak, everitin sef
" I stil dey young, i b just 41 years, so i dey hope say veri soon
sef, i fit go train playas for there make i enjoy am"
Guardiola bin dey tok for the 150 annivasary celebration wey the FA
organise.
" I wan congratulate Ingilish soccer for the 150 years wey dem don
reach, na hapi batday be dat, plus all the pipu wey dey inside dey
help for Ingiland football
" Make una enjoy am, becos una deserve am, and una bin dey veri
important as our beautiful game don defelop reach dia level, una too
try."
