Zambia na real 'ogbunigwe'
by Own Correspondent 13 January 2013, 11:25
Garba Lawal wey been tap soccer for Nigeria in those days don warn Super Eagles say make dem no do gadagada take small eye look Zambia for this African Cup of Nations wey dey come o because gadagada dey tear cloth and if person take small pikin play, the small pikin go take am play o.
The thing be say as the Zambia team wey dem dey call Chipolopolo dey try body for the trading tackles, dem just yab come fall yakata give Tanzania and Angola and come manage get only draw with Morocco, but Lawal say all dat result no fit deceive am say Zambia no strong o.
As Lawal view the whole sequence, him come say “true, true, I no fit take small eye look Zambia just sake of say dem yab for the play play match dem. Anybody wey say dem no be matter get to reason well to remember say na dem win the last Nations Cup and before that time, Nigeria been nack dem two kpondo for Kaduna. Dat na for 2011. Because of dat people come dey say dem no sabi anything but na so dem carry waka go win the cup. I don check the whole thing and I don see say I no fit take small eye look this Zambia people and I no want make Super Eagles fall for this kind trap because if dem do anyhow, dem go see anyhow o.”
Zambia people still dey arrange demself and dem go play one oyinbo contri wey dem dey call Norway on Saturday for one town wey dem dey call Ndola, Dat same day, Nigeria go try one club wey dem dey call FC Rotterdam for the town of Faro for Potokiri.
As the whole thing arrange, the two teams dey Group C and Nigeria go jam Zambia in the main the main competition for January 25 for South Africa.
fred.edoreh
