Balotelli don chill for him protest
by Andrew Randa 19 December 2012, 17:11
Mario Baloteli don gree for d fine wey im Klub don fine am, afta im bin widraw d appil wey d disiplin comiti dash am, d Klub bin talk on Wedunesday.
D anyhow anyhow strika bin no gree d fine come cari d klub go Premier Lig dem tribunal, and panel sef bin suppose siddon luk d matta for Tuesday, but as e come be e no go happin again.
"All of us don siddon yarn, we don discuss d matta, and as per d respec wey im get for we Coachee, d fans and d klub sef,Mario Balotelli don gree d fine wey we fine am, and im don widraw d appil"
statement wey comot from d klub talk.
" Mario go fit play for d match dem wey we get for front"
Efen as Balotelli wey be 22 years, don agree make im end d matta of d 340,00 pound wey dem fine am, im and Coachee Mancini don reach bridge, na who go cross fess remain, e don reach breakin point sef.
Jose Mourinho sef bin yarn say im na playa wey u no fit manage dat time wey dem dey Inter Milan togeda, and e show wen Citi no even put am for bench talk less to lay for deir game for Newcastle house, afta dem comot am for d fess haff of dem game with Manchesta United lass 3 Saturday wey pass.
Mario Baloteli sef no dey helep imself with all dey yeye tin wey im dey do, dey misbehave inside field, dey kik oda players dem come efen cari banger scatta im baff room.
" E dey pain to see dis kain ogbonge player dey cari im hand scatta im karia and im life, i no juss undastand at all' Mancini bin tell repotas dem wen Manchesta United bin wound dem 3-2 dis month.
Citi sef don tire foe im wahala, im don miss like 11 match insed d 54 wey City play, na suspension upon red card dey rein for im side. Na onli 1 gol im don score dis seasin so, efen douh Mancini dey try do ice water for d matta, afta pipul dey yarn say im fit comot wen Januari show.
