Our win no be fluke-Rooney
by Andrew Randa 10 December 2012, 12:50
Wayne Rooney belif say na d winning mentaliti and confido wey dem Coachee Alex Ferguson gif dem na im make dem take beat dem nebo Manchester City for the match wey dem play.
Efri bodi sabi d way Manchester dem dey take come from back win match even if na dem dey lose, but e come be like say stori don turn upside down wen Zabaleta equalise for 86 minute for City.
D goal sef wey d Argentina defenda score come make d game 2-2 afta Yaya Toure bin score d fess one come comot d two gol advantage wey Manchester United bin get, but Van Persie freekik for inside injuri time make sure na United come win d match.
Dat na City fess loss for dis season and e come make United carry ogbonge six point gap dem rival and nebo City for table for d 16 match dem play dis season.
"No be fluke oh" Rooney talk. "Luk as d match take happen, we no dey ever gif up lai lai, we dey carry go till referee go blow, and na Sir Alex na im teach us dis beta mindset, we no dey gif up at al at al.
D victory sweet Manchester United for belle no be small if u check am see say na d sam City hammer United 6-1 for Old Trafford last season so, come nack dem kondo 1-0 for Etihad sef as City take win d lig for d fess time inside 44 years.
Rooney sef happy dsay na dem break Manchester City record for house, say dem don dey wait for d chance make dem revenge, as dem come beat City, Efribodi dey hapi well well Na Rooney fess open door for d 16 minute as im shot take beat im colleague for National team Joe Hart for City post, before e take double d score to 2-0 from d cross wey Rafeal cross.
D second goal wey Rooney score na im 150 gol for Premeir League for Ingiland, and e come make am d younges player to reach d numba, come add on top say now, im be United leader for gol wey dem score for d Manchester dabi with 10 gol.
