Stallions tell Ghana bye bye
by Ibitoye Shittu 07 February 2013, 10:05
De Stallions of Burkina Faso don reach de Nations cup final for de fess time in dia history afta dem flog Ghana kommot for de sekond semifinal on Wednesday as de Babes win 3-2 on PK.
Naija Supa Eagus don fess sit down dey wait for who go tacku dem for de final afta dem skatta Mali 4-1 for de fess semifinal game for Durban.
Na Ghana fess score for de 13th minute as de rifiree carri PK dash dem bifor Wakeso Mubarak score de goal.
De refiree wey come from Tunisia, Slim Jdidi no helep Burkina Faso at all for de game as de guyman do dem wayo wen im just go disallow de fine goal wey dem score and im no even give dem de PK wey de Babes shout make hin give dem.
Burkina Faso wey we know no dey gree to lose as una rememba say na for de lass minute na im dem score de Naija Supa Eagus for de 1-1 draw wey dem play for dia fess group C game.
Strika Bance na him kon be Burkina Faso savior dis time as na de guyman equalize for de Babes, and walahi dem deserve to win de game.
1-1 na hin be de end of de game afta extra time bifor Burkina Faso kon win for PK as dem go now face de Supa Eagus of Naija for de final on Sunday.
