Ghana no dey fear Mbombela
by Ibitoye Shittu 06 February 2013, 10:03
Ghana coachi, Kwesi Apphiah don tok say de Mbombela pitch wey dey for Nelspruit no be wahala for him boys as dem go tacku Burkina Faso today for de 2013 Afcon semifinal.
Na de Supa Eagus of Naija be de team wey fess complain to Caf about de pitch bifor Zambia skippo too vex complain.
Togo supastar strika, Emmanuel Adebayor kon yab Caf and de Local Organisin committee pipu dat de pitch na disgrace to Africa wen televison dey show am.
Fungus don kill plenti grass wey dey de field as na sand na im full dia now and de thin sef dey embarrass de pipu wey organise de competison for South Africa.
“My playas na professiona and dem go play weda de pitch gud or bad. I don tell dem to carri dia mind kommot for de condition of de pitch as we dey play well well for de field wey worse pass dis one for Ghana so no excuss about de field,” Naso Apphiah tok.
Paul Put wey be de Oga coachi for Burkina Faso don make him boys dey familiar with de Mbombela field as na for dia dem take play dia games bifor dem enta de last 4.
West Africa get swagga for dis 2013 Nations cup as na dia na im all de last 4 teams take come from.
Ghana and Burkina Faso go clash for de sekond semifinal dis evening.
