Drogba don annoint Eagus
by Ibitoye Shittu 05 February 2013, 05:41
De skippo for de Ivory Coast nationa team (you fit call dem de Elephants too) Didier Drogba don troway salute to de Supa Eagus of Naija afta dem skatta de Elephants 2-1 on Sunday for de Afcon kwatafinal wey dem play for de Royal Bafokeng Stadium.
Drogba wey play for all de minutes against de Supa Eagus kon dey impress with de way de Eagus take chop dem as im tok say Naija go win de cup if dem carry on with de way dem take bulala dem kommot for South Africa.
“Walahi I dey impress with de way de Supa Eagus take play us and I want make dem carry de cup.
“I no sure weda any team go fit tackle Naija for de rest of dis competison becos na everyday dem dey improve and I wan make dem carri on with dia swagga and hard work as dem no dey gree to lose.
“Na Naija time be dis and I wan make we salute dem with de numba of home based playas wey dem carry come South Africa as Naija don tell us say correct futball dey de continent,” Naso Drogba tok.
Drogba wey don tap futball bifor for Chelsea for Ingland kon beg Ivory Coast pipu and fans make dem no vex as dem no fit pass de kwatafinal stage for de 2013 Afcon for South Africa.
“Na futball be dat, sometimes you go play well, but you no go win, and we try our best, but de thin no just work for us. I wan make our fans and pipu bear with us.”
