Adebayor yabs Six
by Ibitoye Shittu 04 February 2013, 16:13
Emmanuel Adebayor wey na im be de Togo star strika for dis 2013 Afcon wey dey go on for South Africa don blast Togo coachi, Didier Six afta dem crash kommot for de kwatafinal on Sunday.
De wahala kon stat afta Burkina Faso flog Togo 1-0 and Adebayor kon attack de coach dat na becos de frenchman no get enough experience na hin carri dem kommot for de kwatafinal.
“Our oga coachi no helep us at all and eveybodi know say I try me best for de field but de coachi no try for us for de bench as him no get experience,” Naso Adebayo take bude him oga.
Agassa Kossi wey be Togo goakipa also suport Adebayor as im tok say de frenchman no sabi to change playas at all.
Make una no forget dat Adebayor bin no wan come dis Nations cup bifor, becos of de yawa wey dey bitwin him and de Togo FA pipu wen Adebayor vex dat security and bonuses no dey for playas.
“We get plenti wahala for de national team and na jeje we wan take enta Togo as de tin pain me becos na Burkina Faso na dem pursue us kommot for de competison,”
“My career go carry on with de national team and I belif dat we go win de title on day,”
