Eagus chop Elephant suya
by Ibitoye Shittu 03 February 2013, 20:17
De Supa Eagus of Naija don waka to de semi final of de 2013 Afcon wey dey go on for South Africa afta dem bulala Ivory Coast 2-1 on Sunday.
De Elephants (na Ivory Coast nickname be dat) start de game as dem show correct swagga, but Naija goalie, Vincent Enyeama dey kampe as im pari de shot wey Drogba play kommot.
E no tay at all wen De Supa Eagus also see de best chance to score for de 26th minute as Naija strika Emmanuel Eminike troway de oppurtunity.
Ivory Coast na dem be de favourite for dis competison, and Naija pipu and fans don dey fear bifor dem play dis game dat de Elephants go skatta de Supa Eagus.
But na lie as na de Eagus score fess for de 41st minute wen Naija strika Emmanuel Eminike score a fantastic freekick to put Naija for de lead as de fess half finish 1-0.
Emmanuel Emenike don score 3goals now for Naija and na him and Alain Traore of Burkina Faso dey lead de goal chart now but de guyman no go play again as hin don get injury.
Ivory Coast vex come out for de sekond half and dem equalize for de 50th minute wen Drogba play a correct freekick wen Naija defendas don sleep as dem allow Cheik Tiote score with him head.
Naija goalie, Vincent Enyeama save de Supa Eagus again in de 66th minute as him pari de shot wey Yaya Toure play for corner.
De two team kon dey play correct game for midfield, but na de Naija Supa Eagus laf lass wen Warri Wolves midfida, Sunday Mba score de wina for Naija in de 78th minute.
De Elephants try make dem equalize wen de final minute don dey reach, but de Naija Supa Eagus no gree as dem no allow dem to score.
