Moses don reach Canaan
by Temisan Okomi 25 January 2013, 09:19
Chelsea winga, Victor Moses, don finali redi to tap hin fess Nations Cup ball for Naija, as de Supa Eagus dey fin dia fess three point for inside South Africa.
Moses (de bobo na still pikin sha. He jus reach 22yrs) bin no dey fild wen Naija follow Burkina Faso play 1-1 draw on Monday, but e be like say he don redi to show hin skilla, wen Naija go play Zambia for inside Mbombela Stadium inside Nelspruit on Friday.
E be like say Moses wound don go, so dia coachi, Stephen Keshi, main gbege now, go be how hin wan choose de playa wey go play for front, for Friday 'win or waka' match.
”Victor train well, well yesterday (na Wednesday be dat) and we dey pray say he go redi to play wen match start. We dey look say if hin play, he go carri plenti gree-die enta fild,” na im Keshi bin tok.
Meanwilly, Moses by hinsef, bin don tok say he don redi to tap hin fess ball for Nations Cup.,/p>
Moses (hin bin don tap club ball for Crystal Palace bifor) no jus dey tink am say he wan play hin fess Nations Cup sef, he dey tink as dem go waya Zambia, and even win de cup for hin new pikin, Brentley Moses.
”I don dey follow hin mama tok sef and for my mind o, dis three point wey we wan colet for Zambia hand so, na for my pikin, and even to win de cup for dis South Africa sef,” na im Moses halla.
Victor Moses don tap ball for Naija seven tines alredi, since de fess match wey he play for Supa Eagus.
Hin fess match for Naija na for February 29, for inside Kigali, wen Supa Eagus bin follow Rwanda play match wey follow carri dem come dis Nations Cup.
