Mali fit break Ghana leg again
by Temisan Okomi 24 January 2013, 14:57
Ghana dey fin dia numba five Nations Cup, but de tin fit waka like smoke from faya-wood if dem no get beta result afta dem follow Mali play for inside Port Elizabeth on Thursday.
Ghana bin troway dia fess match wit DR Congo, wen dem close eye allow Congo equalise afta dem bin dey lead 2-kondo, and dem go play Mali wey waya Niger 1-kondo for dia fess match.
Mali sef go still rememba how dem bin waya Ghan for las year Nations Cup, wey make dem carri third, and de tin fit gi dem beta morale.
De match go hapin inside de Nelson Mandela Bay Stadium, and guymen dey tok say na two contri wey still get beta tin for front wan play so, but as Ghana play 2-2 draw wit DR Congo so, pipu look say small pikin fit dey still worry dem.
”I don gada many tins about how dem be, but e no mean say we no go get our own format,” na im Ghana coachi, Kwesi Appiah bin yarn on Wednesday.
On Thursday too, DR Congo go follow Niger play, as Niger dey still fin dia fess point for Nations Cup futbal.
Niger jus dey defend wen dem follow Mali play, and e remain small make dem colet draw, till Seydou Keita come score wen match don dey enta 'las chance'.
If na so dem wan take play DR Congo, wey gada ogbonge strikas, den e go worry for Niger.
