Khumalo, Bafana dey ready for three points
by Ibitoye Shittu 23 January 2013, 08:44
Bongani Khumalo wey na him be de skippo for de South Africa nationa futball team don talk say Bafana Bafana don dey ready to commot de pressure wey dey dia head as na draw na im dem take start dia Afcon campaign on Saturday.
South Africa pipu and dia fans vex no be small for de draw wey dia boys play against Cape Verde wey na dia fess Afcon show be dis.
Khumalo kon yan us for supersport.com say na Angola wey be dia ness enemies on Wednesday na dem go suffer de wahala wey de draw don put for dia body.
“De fess game don waka as we don learn our lesson and we go correct our mistake on Wednesday in our sekond game.
“I wan make we forget de pass so dat we no go make anoda mistake against Angola becos we dey gidigba to wire dem,”
De kind pressure wey dey for Bafana Bafana playas dem don reduce small as na draw na im Morocco and Angola too play for dia fess group game.
De skippo wey na for Greece for obodo oyinbo na im de guy dey take tap him futball kon beg dia fans and pipu say make dem please support dem against Angola.
“Yes we know say we no play well for dat our fess game and pipu don dey doubts weda we go fit reach de kwatafinal and we no get any excuss dan to flog Angola today (Wednesday),” de skippo yan us for supersport.com.
