Zambia Presido tanda for dia back
by Temisan Okomi 21 January 2013, 11:35
Zambia Presido, Michael Sata, don yarn de Chipolopolo (na Zambia guyname be dat) say make dem waya evribodi wey dem go follow play, wen dem start dia Nations Cup gbege on Monday.
”Make una rememba say all Zambia pipu dey una back gidigba! Wen una start on Monday, make una fite well, well. No let mind fail una, make una fite like de pipu wey fite for Zambia. Una don win de cup bifor, but we wan make una win am again. Make una no tink anytin. Make una go play, and even if na de South Africa una meet sef, make una bulala dem well,” na im Presido Sata tok, as all man dey hail am.
No be onli Zambia Presido bin dey dia sef. Hin wife, Zambia Fess Lady, Dr Christine Kaseba bin follow am, plus dia Sports Minista, Chishimba Kambwili and oda obonge Zambia oga dem.
Na inside Protea Hotel for Nelspruit na im Zambia futbal oga, Kalusha Bwalya, bin helep welcome dia presido. Even oda oga from Zambia futbal bin dey dia, plus de Premier (na like govnor be dat) of Mpumalanga Province even send hin pipu to follow welcome de presido.
Zambia futbal oga, Kalusha Bwalya, come tank dia Presido well, well, sake of say hin dey suppot Zambia futbal and he no dey eva shake wen Zambia futbal want sontin.
”Oga, we belle sweet as you come so. Na de whole team na im happi so, and we go play beta ball for dis Nations Cup,” na im Kalusha tok.
Zambia, wey be current oga for Africa futbal, go start dia match for inside Group C on Monday, wen dem go follow Ethiopia play.
Na for Mbombela around five o clok na im de match go start.
