Goal no gree come for Afcon
Weather bin cold well, well, pipu drive moto from far place, futbal no sweet then goal no come gree appear as Nations Cup start on Saturday for South Africa.
De Nations Cup wey all man bin dey wait for – de tin start small, small for 1957 and e don mature reach wetin de whole world dey look now – come start wit 0-0 draw wen South Africa and Cape Verde play, for match wey no sweet at all.
As dem play finish, Angola and Morocco come play dia own for de same Soccer City stadium, and even tho dat one bin sweet small, dem still no fit score goal for dia.
De onli pipu wey be like say dem happy small na Cape Verde coachi, Lucio Antunes, and hin playa dem.
Hin bin happy say hin team play de match finish wit beta confido say dem go fit play Morocco and Angola, for de Group A match wey remain, so dat dem no go waka comot from Nations Cup quick, quick.
”For my side o, we do our work finish,” na im Antunes tok. “My team bin play well, well, we do de work wey we come do and we belleful. Na to wait for Morocco remain now.”
”My belle sweet me, de playas dem sef happy and my pipu happy. We show pipu say our contri sef na beta one. We no plenti for dia, onli 500,000 pipu, but we make dem happy.”
South Africa coachi, Gordon Igesund, bin no gree wit Cape Verde coachi afta de yamayama match wey dem play for dat kin ogbonge cold, plus rain sef, wey bin dey stadium
All dat one na tori sha, becos de cold and rain no bin fit reduce de way de pipu dey blow dia vuvuzela (dat plastic tin wey be like trumpet) sha. De noise na helele.
”Many of de playas no redi for dat first haf and de second haf no too beta pass am sef,” na im Igesund yarn amebo dem afta de wowo futbal wey all man for Africa look.
”Some playa be like say dem be third mainland bridge. Dem jus stand for one place wen refree blow wisu. Maybe de Nations Cup bin too big for dem.”
”Now we mus try win de oda two match wey we go play wit Angola and Morocco. We bin wan win, but make we sef tok true say Cape Verde try. Dem sabi tap ball well.”
”Many of dia playa dey tap dia ball for obodo oyibo. Dem sabi defend well, come slow down de match for second haf. Na de draw dem bin want and em get am.”
Na Cape Verde for even win am sef, wen Luis Soares wey dem dey call Platini, miss de kin ball wey de original Platini for score sharp, sharp, wen match jus reach 13 minit.
PLATINI TROWAY CHANCE
Babanco bin pass one kin ogbonge ball for Platini, near de goalie, but as e remain onli South Africa goalie, Itumeleng Khune, for am to dribble, Platini kick one kin nonsense shot and de ball jus waka pass post.
De onli chance wey bin hapin for second haf na wen Khune use 'anyhow' save ball wey Heldon bin head, go corner.
Dis Nations Cup no even resemble de way World Cup bin start wen South Africa do am for 2010.
Dat match sef na 1-1 draw wit Mexico, but all man rememba how South Africa bin score goal dat time; Siphiwe Tshabalala bin tear beta shot wey tear net dat time. On Saturday? E no kukuma resemble am sef.
Angola and Morocco no gree score for de second match, but dia own match bin sweet pass de fess one.
Morocco bin show all man say dem redi for Nations Cup and Angola, wey carri many small pikin come, show sef say dem no come count bridge for South Africa.
As e be, Angola sef for win de match if to say Manucho and Guilherme Afonso leave de ball for demsef wen time reach 88 minit.
De Nations Cup dey continue on Sunday wen Group B match go start for inside Port Elizabeth. Ghana go play DR Congo, den Mali go follow Niger play afta.