Copper Bullets name dem Afcon squad
by Temisan Okomi 09 January 2013, 10:15
Africa champion, Zambia, don do dia final naming ceremony of de 23 playa wey go helep dem waka for de Nations Cup for South Africa.
Zambia coachi, Herve Renard, no gree carri old cargo, defenda Chintu Kapamba (e fit be say as de guyman neva get club since June, dem no too get confido), but dem still put 19 playa out of de 23 wey helep dem win de cup for Equatorial Guinea and Gabon, inside de team.
Zambia don dey prepia since and dem follow Morocco play on Tuesday, for 'play-play' match wey nobody fit score sef. Dem go still follow Norway play on Saturday, for inside Ndola (inside Zambia) bifor dem go travel reach Nelspruit (inside South Africa) to follow Namibia play, next week.
De two match na 'play-play' and e go be Zambia las match bifor Nations Cup go start on de 19 of January.
Zambia go start 'de main de main' Nations Cup waka from January 21, wen dem go play Ethiopia for Group C (na Naija group be dat o!), inside Nelspruit for South Africa.
Zambia Team:
Goalie: Daniel Munyau (Red Arrows), Kennedy Mweene (Free State Stars), Joshua titima (Power Dynamos)
Defenda: Hichani Himoonde (TP Mazembe), Francis Kasonde (TP Mazembe), Emmanuel Mbola (FC Porto), Joseph Musonda (Lamontville Golden Arrows), Davies Nkausu (Supersport United), Stopilla Sunzu (TP Mazembe)
Midfilda: Isaac Chansa (Henan Jienye), Noah Chivuta (Free State Stars), Rainford Kalaba (TP Mazembe), Christopher Katongo (Henan Jienye), Felix Katongo (Petro Atletico), Chisamba Lungu (Ural Sverdlovsk Oblast), Mukuka Mulenga (Power Dynamos), William Njobvu (Hapoel Beer Sheva), Nathan Sinkala (TP Mazembe)
Strika: James Chamanga (Dalian Shide), Emmanuel Mayuka (Southampton), Collins Mbesuma (Orlando Pirates), Jacob Mulenga (FC Utrecht), Jonas Sakuwaha (Al Merreikh)
